菲瑞泰尔密语

--仅此献给，從前恋爱中嘅小女人同18岁嘅你

[开场]

唔知，人係米一出世就已经被安排好要行嘅路线，要走嘅方向，要经历嘅命运。

从陨石为我降落，朝阳为我东升，母亲为我微笑开始，我沿住世界俾我嘅路线，印证上天语言嘅命运。

某段路嘅结束，某段路嘅中途，某段路嘅开始，光与影交错，命运一次次将我抛高，转眼又推入谷底。我用一分一秒砌成嘅生命，际遇迎面嘅未知。

唔知跟住落嚟发生嘅一切，究竟係早已安排好嘅命运之轮，抑或係我自己唔小心跌入咗命运嘅“啦隙”。当蒲公英漫天飞舞，当北上嘅海龟停下脚步，当浮云向我招手。我拨开轻雾，遇见夏末阳光下嘅你。

[一是一]

遇见篇(遇见)

所有事情都恰到好处咁发生，彷佛多络米骨牌，一环扣一环，紧密连奏。

其实一切应该感谢爸爸嘅决定，“转学”呢个词起我心目中，一直以电视剧所描述嘅姿态出现：带有魔法，可以遇见幸福。

2002年9月1日，我同你由从未某面嘅陌生人变咗同班同学。

当时嘅我，只不过係一个憧憬美好嘅细路女，懵懂而细胆。身边突然充满陌生嘅面孔，令我有啲不知所措，互相认识因此而变得缓慢。

“同班同学” 呢个称呼对我嚟讲只不过係一朵向阳嘅花，层层花瓣剥落之后，内里包裹嘅花蕊，依然係无助嘅两个字“陌生”，暴露起阳光之下。

注定发生嘅事，总会以某种形态潜入生活嘅轨道。

认识你，或者根本就係早已铺垫好嘅结局，而结局，正预示着另一个开始。

如果冇派作业，如果唔係派中你嗰本，如果唔係好心帮我嘅女生，我又点会留意完全唔识嘅你，留意俾好心女仔笑“失败”嘅你，留意突然出现嘅注定。

“睇吓你几失败啊！人哋都唔识你啊！”

你听完之后，微笑接过作业薄。午后陈旧嘅气味，连同阳光下空气中漂浮嘅微尘一同包围你。所有一切之中嘅你，好似隐藏咗啲嘢，係金色嘅冠，蓝色嘅绒衣，同雪白嘅马。

[二是二]

跟踪篇(跟踪你)

正如所有童话故事咁，灰姑娘中意咗王子。每一日，我着住魔法变出嚟嘅天鹅礼裙，踩住透明玻璃鞋，徘徊起你身边旋舞。偶尔偷偷望你一眼，却不敢走上前与你对视。美好嘅幻想起我内心深处生出柔软嘅触角，伸向如阳光般嘅你，轻轻触碰，小心体会甜蜜。

放学之后，伴随你嘅消失，南瓜车公主裙嘅魔法亦会逐渐被落日带走，被黑暗吞噬。于是，我只好踩住你嘅脚步尾随你，等你一直一直起我视线前面，直到星星出现，直到霓虹灯点着，直到你返到屋企消失不见，

我亦收拾好脚步，藏好你唔小心遗留起空气中嘅温度，转身而离去。

如果你见过一个着住暗色布裙嘅女仔，嗰个一定係我。魔法消失之后，只有玻璃鞋轻吻地面嘅声音陪伴我一同挂念你。

[三是三]

爱侣篇(可惜她有女朋友)

所有童话故事，都会有天使嘅祝福，都会永远幸福。

我以为我哋係童话故事里面嘅主角。我係灰姑娘，你係王子。

只可惜，王子係骑白马嘅王子，而唔係手持玻璃鞋嘅王子。

我从另一个童话故事嘅缺口中，遥望属于你同白雪公主嘅幸福。天使从我头顶飞过，遮住阳光。

俾晒你！我唔需要阳光，所以送俾你。唔需要甜蜜，送俾你。所有嘢都俾晒你！

请你幸福。

[四是四]

短信传情篇(长讯不如短信)

扮演路人甲嘅我，已经唔再需要魔法为我带嚟美丽嘅长群同夺目嘅光辉。就算夺目如太阳，亦敌不过温柔嘅白雪公主。就算璀璨如明星。

小王子又点会因为狐狸而放弃玫瑰花？我唔奢求奇迹，只希望起你身边见证你嘅幸福！

终于，小王子转身望咗日夜追随佢嘅狐狸一眼。

你发短信问我：“好闷啊，你做紧乜啊？”可能你只根本忘记嗰个号码嘅主人係边个沐浴是发信息求证。

点都好，多谢你有意冇意嘅开头。

好似理所当然咁，我变咗你嘅手机密友。你通过信息向我展开内心。

其实好奇怪，人嘅感情同语言，竟然可以通过文字，经由电波传到另一个人嘅手上，转换返语言同文字，并相互感染同化。

你开始变得可以用文字主宰我嘅喜怒哀乐。

你同女友嗌交，捧住受伤嘅心向我倾诉。我感受到你嘅痛苦，于是一小块一小块撕下自己嘅心，搓成短信send俾你，好填补你嘅痛楚。

我话过，我唔需要，就俾你。

我连心都唔要啦。

[五是五]

甜蜜恋爱篇(甜蜜谈恋爱)

慢慢，慢慢，慢慢，我再冇心可以交俾你喇，你嘅心大概亦已经被填满。当佢下次再受伤嘅时候，我实在唸唔出仲有乜嘢办法可以治愈。到咗嗰阵，你或者应该去咗揾另一个心喇。

于是，我日夜祈祷上天可以帮你。

终于有一日，你同女友彻底分手。正当我唔知点算嗰阵，上天偷偷派天使降临，偷偷帮我填补你嘅心。

我流泪。

有天使替我爱你喇。咁我就可以自己一个人，安心等待重生。

正当我准备离开嘅时候，你拉住我，递俾我一个透明玻璃樽。

你笑住话：“日日淋水，可能会开花嘎！”

你将你嘅心分开两半，一半俾我，一半俾你。

从我同你相遇到相爱，地球绕太阳转咗一圈零25日。由嗰日开始，我同你日日为佢哋淋花，等待生出完整嘅两个心。

[六是六]

4ever love (forever love)

喺地球某一处，有块好大嘅红色沙漠，沙漠入边生长住一种七色花。相传只要穿过呢个沙漠，并寻找到七色花嘅人，就可以得到永远嘅爱情。

其实，呢个神秘嘅沙漠就存在于每一个人嘅心入边。

要得到爱情，必先诚心穿越自己心中嘅沙漠，期间可能好艰苦，好无助，好孤独……

但当你见到七色花嘅嗰一刻，曾经经历过嘅每一切痛苦变得唔再深刻，阻碍你前进嘅恶魔亦会失去意义。

当我将心分俾你，我见到埋喺内心深处，红色沙漠之中嘅七色花。

我知道，以后，有爱情支撑我，我唔会再孤独，南瓜车公主裙唔会再消失，着住暗色布裙嘅孤寂身影唔会再出现喺夜幕嘅街角中……

我唔会再流泪…有爱情支撑……

童话故事以幸福嘅形态结尾，所有观众合上童话书，嘴带微笑并祝福。

我同你手拖手企喺未来面前。

未来问：“男主角同志，请问你愿唔愿意将你嘅幸福同爱情mix埋一齐，制成唔会有保质期嘅士多啤哩芝士蛋糕啊？”

女主角小姐：“你又愿唔愿意将你嘅笑容变成忌廉花边捞埋落士多啤哩芝士蛋糕度，变成士多啤哩芝士忌廉蛋糕啊？”

“男主角同志，唔该回答我嘅问题啊！……男主角同志……男主角同志……唔该回答我嘅问题啊!”

Clover