新年前兩星期, 靠食板前止住牙痕 (好孩子抵食壽司餐單: 海潚價 50 元有找! (女士胃口) , 工作忙又病左幾日, 終於可以食餐好味日本野! 年廿九同小S子黎呢間0係銅鑼灣既 "穴", 之前試過一次, 味道幾好既! 至於今次點呢? 好唔好食? 又睇落去? 食之前去睇"奇幻逆緣", 呢套戲未上之前, 知道個故事大鋼已經好想睇, 有阿甘正傳編劇操刀改編, 仲有十幾個奧斯卡提名tim! 睇完之後覺得值回票價, 百五分鐘比觀眾有得著同思考, 我好少0係 blog 寫影後感, 呢套都值得寫 : 幾欣賞中段 Benjamin 自講述既 "如果", 如果架車開遲 d; 如果 Daisy 同學的鞋帶無斷; 如果店員無失戀; 如果司機沒有買咖啡; 如果男人有調鬧鐘, 咁 Daisy 就唔會比車撞到。套戲講其中一樣野係 "命運\"。雖然只係差一秒時間, 事情發展都會有不同, 意思係冥冥之中有主宰...除左 Daisy 比車撞, 仲有故事中多次比雷劈中既阿伯, 命運要你比雷劈, 你點避都避唔到 ; 仲有 Benjamin 自己既"返老還童"既身世, 都係命運, 講到尾你係要接受, 正如 Benjamin 講: 你可以好似癲狗咁發狂; 可以用粗口鬧命運之神, 不過你最後都係要接受同睇開D! 其實我唔係完全同意, 當然面對控制唔到既生老病死, 人只能夠好平靜咁接受, 就正如套戲最後一幕, Benjamin 好靜好靜咁離去...呢 d 係控制唔到。我意思係如果自己可以控制到既, 唔應該話係"命運\", 未睇"奇幻逆緣"前, 我睇完桂莉芙柏德露套"Sliding doors 緣份兩面睇" 覺得"命運\"同"天意"唔係事情結果既全部...而我同意有 D 事實真係無可能改變, 不過0係事件發生前一定要盡過力同做左應做既本份咁解。 睇到 Benjamin 見佢個女, 但係又唔可以相認, 再同 Daisy 講一番話, 我意識到應該係 Benjamin 既"遺言", 佢為左 Daisy 同個女有一個正常生活而忍痛離開, 去到0個幕我已經0係度死頂索左兩下...去到 Benjamin 變左小朋友同 Daisy 對佢既無奈...到最後睇到老左既 Daisy 抱 BB 既 Benjamin 結果真係頂唔順咁缺堤...之後快快趣去洗手間洗個臉, 仲遲過小S子出洗手間! hahaha... 地址 : 銅鑼灣駱克道491-499號京都廣場5樓 龍蝦沙津: 飛魚子混龍蝦碎幾有咬口又醒胃, 建議師傅混沙津時落 d wasabi, 少少辛辣味道會更好! TORO 薄脆: 人氣 number 1 之選, 上次食過幾鍾意, 拖羅碎好嫩滑亦唔太油, 一口咬下, 上軟下脆口感特別 (係呀! 口感呀! haha...), 食完一整塊我會以 "可愛" 黎形容呢個 TORO 薄脆! 牛肉火鍋: 天氣涷叫個鍋, 小S子 good choice! 個火鍋同生蛋分開上, 夠細心! 因為唔係人人食蛋呢! 牛肉生生地上, 我 pick 左塊最生既食, 薄薄地肉質夠嫩, 係差 d 牛肉味; 小S子 pick 一塊半生熟食, 整體都滿意! d 湯熱熱地, 好快 d 牛肉都熟哂, 今次試食一塊全熟, 都好嫩, d 肉一 d 都唔老, 水準唔錯! 西京銀鱈魚: 日本熟魚中最愛銀鱈魚, 又滑又甜又唔腥, 呢間"穴"同最近食銀鱈魚既"惠比壽"相比, "惠比壽"比較滑同厚一d亦好味 d! 提子乳果: 似乎冰多一點...小S子飲剩就知道味道唔得喇! 上次0係"穴"食過士多啤梨雪芭, 味道亦好一般...。 環境: 3.5 (環境暗黑, 一出lift前面有個中通屏風同小石路,簡約佈置。) 衛生: 3.5 (餐具排列整齊, 上枱食物整潔。) 服務: 3 (預先 book 位, 睇戲遲左我打電話 confirm, 肯留位, 望銅鑼灣街境位也不錯。) 設計: 3.5 (Menu 圖片文字清淅。) 味道: 3.5 (我地既幾味菜都好味, 至於甜品似乎有改進空間!) 價錢: 3 (埋單三百多, 銅鑼灣價錢 ok。) 最終評分: 3.5 整體幾好, 聽聞"穴"既七彩角切魚生飯更係指定必叫, 下次試下。